Turismo Zuzendaritza Nagusiak, Nafarroako Berrikuntza Turistikoko Laborategiaren bitartez, benchmarking bidaia berri bat antolatzen du Italiara Nafarroako turismo sektorearentzat, 2024ko urriaren 21etik 25era bitartean. Oraingo honetan, atzerrian ikasteko ekitaldia Toscanan eta Emilia Romagnan zentratzen da. Italiako bi eskualde horiek produktu turistikoen garapenaren adibide dira, enogastronomiako esperientzietan arreta jarrita.

Bidaia hau Nafarroako turismo eta nekazaritzako elikagaien sektoreko enpresa, elkarte eta entitateei zuzenduta dago, eta uztailaren 16ra arte aurkeztu ahal izango dira parte hartzeko hautagaitzak, izena emateko galdetegia betez. Lehentasuna izango dute enogastronomiako produktuei bultzada bat emateko lanean ari diren enpresek. Erakunde parte-hartzaileak hautatzerakoan, kontuan hartuko da turismora bideratutako proposamen enogastronomikoen garapena, bai eta horrekin lotutako prestakuntzetara joatea ere. Irizpide gehien betetzen dituzten enpresak hautatuko dira, eta berdinketa gertatuz gero, zozketa egingo da notarioaren aurrean, erabilgarri dauden 11 plazak bete arte. Bidaiak barne hartzen ditu bisitak eta prestakuntzak, lekualdatzeak eta ostatua pentsio osoan.

Aurreko martxoan Eslovenian atzerrian egindako ikaskuntza-ekitaldian bezala, bidaia honetan ere zuzeneko konexioak izango dira aldibereko itzulpenarekin, Italian bisitatzen ari diren ezagutzak eta esperientziak eskuratu ahal izateko. Zuzeneko horietan parte hartzen dutenek galderak zuzenean egiteko aukera izango dute, eta bisitetan grabatuko den bideo-material guztia ikusteko aukera izango dute ere. Bidaiatik itzultzean webinario bat antolatuko da, parte-hartzaileek beren ikaskuntzak sektoreko gainerakoekin parteka ditzaten. 

Ikaskuntza-bidaia hau bi etapatan banatuko da. Lehenengo zatian, Toscanako eskualdea ezagutuko da. Izan ere, eskualde hau ondare-baliabideengatik ezaguna izatean gain, Chiantiko ardo-eremuagatik eta enoturismo, oleoturismo eta nekazaritzako beste elikagai batzuengatik ospetsua da ere. Bidaiaren bigarren zatia Emilia Romagna eskualdean zentratuko da, non italiar JI garrantzitsuenetako asko dauden, hala nola Parmigiano Reggiano gazta, Lambrusco ardoa edo ozpin baltsamikoa eta prosciuto di Modena. Bi eremu horietan turismo-enpresak eta nekazaritzako elikagaien enpresak bisitatuko dira, eta bilerak egingo dira helmuga-turistiko honetako erakunde kudeatzaileekin. Ikaskuntza-ekitaldi honi buruzko informazio eta xehetasun guztiak turismoko webgune profesionalean aurki daitezke

Jarduera hau Nafarroako Berrikuntza Turistikoko Laborategiaren ekintzen barruan kokatzen da, eta NASERTIC enpresa publikoak antolatzen du, Turismo Zuzendaritza Nagusiaren enkarguz, Navarra Rural Helmugen Arteko Kohesio Ekintza barruan. Europar Batasuneko Next Generation funtsen kontura finantzatutako ekimena da, eta Espainiako Gobernuaren Berreskurapen, Eraldaketa eta Erresilientzia Planaren onarpenarekin gauzatzen da.