EuroVelo 1 . Atlantikoko Kostaldeko Ibilbidea

Gipuzkoatik, EuroVelo 1 Bidasoako Bide Berdetik sartzen da Nafarroan, Endarlatsatik, zehazki. Beratik hurbil igarotzen da, Zalain-Zoko auzoan barna, gero Berrizaun dator, eta, ondoren,  Sunbilla. Handik 5 kilometrora Doneztebe dugu.

Ibilbide erraza eta atsegina, ia laua.

Malerrekan, mendiz inguratuta —Mendaur da nagusia—, Doneztebe herri dotorea dago. Tarterik aldapatsuenak Doneztebeko irteera (motza baina gogorra) eta Oiz herriaren eta Gorostietako gainaren arteko errepideko zatia dira.

Doneztebetik, herri hauetatik igarotzen da bidea: Donamaria, Oiz, Urroz, Beintza-Labaien eta Saldias. Gero, Gorostietako gaineraino iristen da, non atsedenleku bat baitago.

Handik, Basaburua da hurrengo helmuga. Baserri handiak, lore-loretsuak, daude ibar horretako herri xarmagarrietan: Ola, Orokieta, Erbiti, Gartzaron eta Jauntsarats (milurteko haritzengatik ezaguna). Jauntsaratseko atsedenlekuan geldituz gero, bainu-eremu bat duzu gozagarri. Hurrengoak Ihaben, Etxaleku, Eraso eta Latasa dira. Azken horretan, Plazaola trenaren antzinako geltoki bat dago. Zaharberritu ondoren, taberna-jatetxe bat jarri dute, baita bizikletak alokatzeko zerbitzua ere.

​​​​​​​Hemen, ibilbideak Plazaolako Bide Berdeko bideari jarraitzen dio, Irurtzuneraino.

Zati hau Irurtzungo atsedenlekuan hasten da. Antzinako trenbidearen geltokia zegoen lurretan dago atsedenlekua.

Ibilbidea Itzako udal-mugapetik igarotzen da. Guliako biaduktua nabarmentzen da han, 17 harrizko arkuz osatua. Ondoren, Saratsate zeharkatzen du. Eritzera iritsi baino lehentxeago, igoera labur baina gogor bat dago, % 13ko maldarekin. Tarte hori igarota, aise iritsiko gara Saratsa herriraino.

​​​​​​​Eta beste 9,6 kilometro egin ondoren, Iruña hiriburua iristea lortuko duzu, Oteitza Berriobeiti, Berriogoiti, Aitzoain, Berriozar eta Artika atzean utzita.

Iruñetik, EuroVelo 1 ibilbideak EuroVelo 3 ibilbidearekin bat egiten du. Erromesen ibilbidea esaten zaio, Donejakue bidearen ondotik baitoa.

Ibilbidea toki hauetatik igarotzen da: Zizur Nagusia, Arlegi, Subitza, Biurrun, Ukar, Eneritz, Eunate, Gares, Mañeru, Zirauki eta Lizarra.

EuroVelo ibilbideak ez doaz beti Donejakue bideko bidezidorretatik, tarte batzuetan baino ez, zirkulazio gutxiko bigarren mailako errepideak ere erabiltzen dituelako.

​​​​​​​Kale-herriak, Erdi Aroko zubiak, monumentu handiak, urtaro bakoitzean kolorez aldatzen diren paisaiak, ardandegiak eta kalitate handiko gastronomia aurkituko dituzu ibilbide honetan.

Ibilbideak Nafarroako azken kilometroak egiten ditu Errioxako lurretan sartu aurretik. Lizarratik atera eta berehala, Iratxeko monasterioa dago. Aurrerago, Villamayor de Monjardíngo harkaitz-gaztelua atzean utzi, eta ibilbidea Los Arcosera, Torres del Ríora eta, azkenik, Vianara iritsiko da. Azken hau muino baten gainean eraikia dago, zeruertzera begira, Araba eta Errioxari so.