Gazteekin edo nerabeekin bidaiatzea erronka handia izan daiteke, baina Nafarroan baditugu osagai guztiak berriz ere ez entzuteko: "Asperturik nago!"

Hasteko, adrenalina askatuko dugu hemen ditugun abentura parkeetako batean. Tirolinak, abiadura handian irristatzeko txirristak, zirkuituak zuhaitzetatik. Hemen ez dago aspertzeko denborarik. 

Ez al zarete nekatu? Atera itzazu bizikletak, Nafarroan dauden 5 bide berdeetako batean ibiliko gara eta. Errazak dira, handienek ere egin ditzakezue. Txikiak aise ibiliko dira. Erronkak jarriko dizkiegu, ea nor iristen den lehenengo tunelaren amaierara! 

ZER DAGO JATEKO?

Esaldi ohiko (eta jasanezin) horietako beste bat. Lasai, Nafarroako tabernak ospetsuak dira, frijitu eta pintxoak egiten dituztelako. Dugun oparotasunarekin, "hau ez zait gustatzen" esaldi tipikoa ere ez duzue entzunen. Hemen dena gustatuko zaie, kroketak, txistorra, eta zer esanik ez txingarretan erretako azpizuna probatzeko zortea badute. Gazta maite duzuenontzat, Erronkariko eta Idiazabalgo Jdak ere baditugu. Gozokiak ez du huts egiten: tututxo batzuk, almendra garrapiñatu batzuk edo txokolatezko garrotiko batzuk... Eser zaitez mahaian eta utzi Nafarroako gastronomiari berean egiten.

Gure ibilbideari jarraituko diogu ipuinak kontatuz. Misteriozko ipuinak, Zugarramurdiko akelarreak eta Erdi Aroko ipuinen eta sorginen museoa, Erriberriko Gazteluaren bisita gidatua egiten dugun bitartean, zeruertzean etsaien tropak entzun edo ilunabar ederra ikusi bitartean. 

LANDA TURISMOAREN XARMA

Ikasi duzue sua pizten? Horixe dute landetxeek. Sua pizten da eta istorioak kontatzen dira. Historia horien agertokia izan daiteke egunean zehar bisitatu ditugun gazteluak edo gure landetxea dagoen herri ederreko kaleak.  

Eta biharamunean, Goazen oihanera onddotara! Saski bat eta labana bat hartu behar dira, eta ikusi nor den trebeena altxorraren bila; baina, kontuz, aurkitzen dituzuen batzuk pozoitsuak izan daitezke. Komeni da ondoan gidari aditu bat izatea, lagunduko diguna eta, bide batez, oihanak ezkutatzen dituen bitxikeria mordoa kontatuko diguna. 

Oporrak amaitu egiten dira eta etxera itzuli behar da, baina oraindik gauza asko geratzen zaizue egin gabe. Lasai, hemen itxaroten zaituztegu, berriz ere itzuli nahi duzuenerako elurtutako mendietara eta udako ibai-igerilekuetara, gure bisitari onenekin denbora partekatzeko atseginez izanen gaituzue.