Bidezidor sakratuak

Jurramendi karlismoaren mendi sakratua da, eta bere bidezidorrak, kultu-objektuak MTB maite dutenentzat. Mota guztietako norgehiagoken lekuko izan dira bere bidezidorrak, gerra karlisten bataila odoltsuenak zein kirol-modalitate horren hastapenetatik bere magalean ospatu izan diren probenak. 

Mendiko iparraldean hasten da bidea. Hezeagoa izanik, artadiak nagusitzen dira. Gero, mendebalderantz joko dugu. Gorantz egingo dugu, Lukingo mendian barna, harik eta Jurramendiko lautadaraino iritsi arte. 27.1 kilometroan dagoen bidea hartuz gero, eskuinetara, antenen gailurrera igo ahalko gara (guk ez dugu sartu). 

Gure bideak, ordea, Aiegira itzuliko gaitu. Bidea ederra da, maldan behera. Ez da arriskutsua, baina kontuz trazadurekin. Labur esanda, mota guztietako bidezidorrak, teknikoki nahiko errazak, gozamen handienerako.