Kultur: Hartzak Zeruan. Bidean

Nafarroako herri txiki bateko (Hiriberri Arakil) udaletxeko biltegian sortu ginen, eta Hartzak Zeruan PowerDuoa gara.

Biok, Aitor eta Alain, beste proiektu batzuetan egon gara, eta kontzertuetan ezagutu dugu elkar, jotzen eta ikusten, beti musikaren inguruan. 2024ko udako egun batean, zerbait jotzeko gelditu ginen, eta pixkanaka-pixkanaka gustua hartu diogu bikote izateari, gauza on eta txarrekin.

Gure helburua da zuzenekoetan energia eta intentsitatea transmititzea. 2024ko azaroan, 6 abestiko lehen EPa (6 ale) grabatu genuen, Bidean izenekoa; masterizatu berri dugu eta argitaratzen ari gara. Telecaster baten riff distortsionatuetan eta baterian oinarritzen gara, erritmo indartsu eta biziekin, eta ahotsen melodiari garrantzia ematen diogu, bion ahotsak ere fusionatzen saiatuz.

Abestiak energia gordinez beteta daude, eta alienazioa, estutasun existentziala eta mundu kaotiko batean zentzua bilatzea bezalako gaiak aztertzen ditugu. Askotan letra ilunak eta introspektiboak
dira, baina edertasun gordin eta zintzoa ere badute.

• Iturgoien, Herriko pLaza, 19.00

Ikuskizun hau Nafarroako Gobernuak antolatzen duen Kultur programaren parte da, uda bakoitzean kultura eszenatoki ezberdin eta ez hain konbentzionaletara hurbiltzeko.