Nafarroa autokarabanaz haurrekin: aholkuak eta bide ahaztezinak

Nafarroako erakargarritasunak txikienentzat autokarabanaz bazoaz

Nafarroan barna autokarabanaz bidaiatzea paisaia txundigarriak eta dibertsioa zati berdinetan konbinatzen dituen esperientzia bat da. 

Izan ere, abentura berri bat biziko dute karabana gelditzen den bakoitzean. Pirinioetako baso amaigabeetatik film bat baino gehiagoren plato izandako Bardeako paisaia txundigarrietaraino, esperientzia desberdina izango da geldialdi bakoitza. Ibilaldiak pagadien artean Iratiko oihanean, paseoak Irunberriko arroilan hegazti harrapariei so egiten diezun bitartean edo dibertsio-egunak Sendavivan, familientzako aisia-parke handian, Nafarroako hegoaldean. 

Txikienekin autokarabanaz bidaiatuz gero, zuku osoa aterako diozu une bakoitzari eta txikiek betiko gordeko dituzte bizitako uneen oroitzapen paregabeak. Bizi nahi badituzu, deskubritu hemen Nafarroak eskaintzen dizkizun plan guztiak.

Planifikatu familia-bidaia autokarabanaz

Nafarroa autokarabana friendly komunitatea da, zerbitzuguneak eta gaua emateko guneak eskaintzen baititu. 

Bidaiari ekin baino lehen, erreparatu ondoko zerbitzuguneei eta gauak emateko guneei. 

Zerbitzuguneak eta gauak emateko guneak autokarabanetarako, haurrekin joanez gero

Zerbitzugune publikoak eta pribatuak aurkituko dituzu, bidean zein kanpinetan, eta autokarabanetarako aparkalekuak ere. 

Oinarrizko zerbitzuak eta zerbitzu komunak dituzte gune horiek, hala nola edateko ura eta ur grisen zein beltzen hustuketa. Jarraian, gune-mota eta zein tokitan dagoen zehaztuko dugu. Irakurri arretaz! 

• Nafarroako herri hauetan topatuko dituzu autokarabanetarako propio egokitutako aparkalekuak: Almandoz, Amaiur, Arguedas (Senda Viva eta Yugoko santutegia), Ekai-Longida, Irunberri, Orreaga, Xabier eta Zirauki. Bikainak dira bide batetik bestera zoazela atseden hartzeko. 

• Zerbitzu osoak dituzten gune publikoak, aldiz, hauetan topa ditzakezu, besteak beste: Agoitz, Aiegi, Antsoain, Arguedas, Arizkun, Arroitz, Artabia, Artaxona, Berriozar, Buñuel, Cascante, Dantxarinea, Erriberri, Etxarri Aranatz, Faltzes, Fitero, Iruña, Irurtzun, Izaba, Lodosa, Martzilla, San Martin Unx, Santakara, Sarriguren, Tafalla, Tutera, Uharte Arakil, Viana eta Zarrakaztelu. Hala edateko ur ona nola ur grisen eta beltzen hustuketa dute guztiek. 

• Gune pribatu bat nahiago baduzu, Fontellasen duzu, Tuterako merindadean. Bideko guneak, aldiz, Altsasun, Legardan, Tafallan eta Zubiri-Saigotsen dituzu. 

Eta honatx aholku azkar bat Nafarroan barna autokarabanaz haurrekin joanez gero! Bidea hasi aurretik, txertatu autokarabanetarako zerbitzuak dituzten herriak ibilbidean. Horrela, non gelditu, non lo egin edo non aldatu ur grisak eta/edo beltzak jakingo duzu lehenago, zezenak harrapa ez zaitzan. Nafarrak bigantxazale eta entzierrozale amorratuak bagara ere, ez ditugu batere maite ezustekoak. 

Aholku praktikoak ezustekorik gabe bidaiatzeko

Gauzak aldez aurretik prestatuz gero, bidaia seguruagoa izango da, ezustekorik gabea. Hona hemen aholku praktiko batzuk ahalik eta gehiena gozatzeko. 

• Egiozu prebentzio-mantentzea autokarabanari. Aztertu gas-ponpak eta prestatu deposituak. Eta ez ahaztu oinarrizko ordezko piezak! 

• Eta duela asko gidatzen ez baduzu edo estreinako aldiz gidatu behar baduzu, praktikatu aparkatzeko eta biratzeko maniobrak bidaia hasi aurretik. 

• Jakin itzazu aldez aurretik gaua emateko guneak eta zerbitzugune-motak. Txerta itzazu Google Maps-en intereseko puntu guztiak. 

• Zehaztu helmugak eta bidaiaren iraupena. Lagungarria da maleta prestatzeko, autokarabanan oinarrizko jaki ez-galkorrak sartzeko eta zenbat gastatuko dugun (bidesariak eta gasolina) gutxi gorabehera kalkulatzeko. 

• Aztertu eguraldia iragartzen duen app-a bidaia hasi aurretik, ekipajeak hartzen duen tokia optimizatzeko. 

• Nafarroan ez dago masifikazio handirik, baina, goi-denboraldian bazoaz, hobe egiaztatzen baduzu aldez aurretik erreserbatu behar den bisitatu nahi duzun tokia. 

• Eraman eskura autokarabanaren dokumentazioa, eta familia osoarena ere bai. 

• Abiatu aurretik, egiaztatu konpartimentu guztiak behar bezala itxita daudela, sabai-leihoak barne. 

• Ez ahaztu ziriak, eta ez ahaztu jartzea aparkatzen duzunean, eta hartzea alde egiten duzunean. Oinarrizkoa da, baina batzuetan atzean geratzen dira. 

Familian egiteko ibilbide eta esperientzia ezinbestekoak Nafarroan

Askotarikoa da Nafarroa, eta zur eta lur utziko zaitu egonaldiaren iraupena edozein delarik. Asteburua? 5 egun? Nahi adina denbora? Bidea eta bizi nahi dituzun esperientziak egokitu besterik ez duzu. 

Egin behar duzun lehena da erronkariarren abelbidea ezagutzea. Hau da, transhumantzia egingo duzu baina autokarabanaz. Geldi zaitez bideak zeharkatzen dituen herrietan. Beeee, bee! Zer iruditzen?

Erronkariarren abelbidea 131 kilometro luze da, eta Nafarroako abelbide nagusia da, zalantzarik gabe. Erronkaribarko Pirinioak eta Bardea lotzen ditu. Bideko toki hauetan gelditzea gomendatzen dizugu: Izaba, Burgi eta bere Almadiaren Museoa, Leireko monasterioa, Xabierko gaztelua eta Bardeako Parke Naturala. 

Natura eta esploratzeko parkeak
     

Nafarroa autokarabanaz haurrekin esploratzea bide bakoitzak sekretu bat gordetzen duen lurralde bat deskubritzea da. Nafarroako paisaiak ibiltzeko, aire garbia arnasteko eta naturaren oparotasunaz gozatzeko gonbita dira. 

Hala familian erlaxatzeko moduko paseo errazen bila bazabiltza nola bidezidor gogorragoak edo ur-jauziak edo bazter magikoak jomuga duten ibilaldiak egin nahi badituzu, Nafarroak beso zabalik hartuko zaitu. Deskubritu Nafarroako ezinbesteko bidexkak. 

Gazteluak eta herri xarmagarriak

Erdi Aroan murgildu nahi baduzu, ordea, toki ezin hobea da berriro Nafarroa. Heldu haurrei eskutik, eta jo Nafarroako Erdialdera. Europako jauregi ederrenetako bat izango duzu gozagari han: Erriberriko errege-erreginen gaztelu-jauregia 
4.000 biztanle baino ez ditu Erriberrik, Nafarroako Erdialdean, baina bere kale harriztatuek eta etxetzar nobleek aho bete hortz utziko zaituzte. Ez galdu Erriberriko errege-erreginaren jauregirako bisita gidatua. Eta egizu patxadan, merezi baitu herriko karriketan barna ibiltzea eta inguruko ardo gozoak probatzea. Zerbaitengatik deitzen diote Ardoaren Hiria Erriberriri. 
Izan ere, bai Erriberri, bai San Martin Unx (10 kilometrora baino ez), Nafarroako ardoaren bihotza dira. Ardo gorriak ematen dio ospea azken horri. Beraz, sar itzazu kutxa batzuk autokarabanan. Erreserbak, ongi etorri oraingoan! 

Armadurak jantzita eta ezpatari helduta gauden honetan, ekin diezaiogun berriro bideari, altxor ugari gordetzen baititu: Xabierko gaztelua, Artaxonako zerkoa, Uxueko Andre Maria gotorleku-eliza eta Amaiurko gaztelua, besteak beste. Ezagutu eraikin izugarri horien xehetasun guztiak hemen. Aprobetxa ezazu, bidenabar, Nafarroako herri xarmagarrienak  ezagutzeko, liluragarriak baitira. 

Jarduerak eta gastronomia guztiontzat

Urdailak nora zuek hara, halakoak zarete zu eta zureak? Bada, adi egon, hatzak miazkatuko dituzue eta! 

Iruñean, Nafarroako hiriburuan gelditzeko unea da orain. Ezagutzen al dituzu bertako plater tipikoak? Nafarroako sukaldaritza tradizionala lurraldeko produktu ugarien emaitza da: Tuterako kukuluak, pikillo-piperrak (JD), ogi-apurrak artzain erara, betekia tomatearekin, orburuak, kardoa urdaiazpikoarekin eta arkumea txilindron erara. Bai Iruñean, bai Iruñerria osoan, baita aipatu ditugun herri guztietan ere, karta oparoa, menuak eta pintxoak eskaintzen dituzten ostatu eta jatetxe ugari topatuko dituzu.

• Horrez gain, txikiek nafar gastronomiari buruz modu ludikoan gehiago ikastea nahi baduzu, hona jo dezakezu: Amaiurko talo-tailerra. 

• San Adriángo Fábrica Vieja kontserba-fabrikak, Lizarrako merindadean, fabrika eta bere museoa ezagutzeko bisitak egiten ditu. Jarduera ezin hobea da, beraz, Nafarroako Erriberako kontserba-tradizio handia ezagutzeko. 

Zergatik da plan bikaina familientzat Nafarroan barna autokarabanaz bidaiatzea haurrekin?

Nafarroan barna haurrekin autokarabanaz bidaiatzea, helmugaz ez ezik, bideaz ere gozatzeko modu bat da 

Denetarik baitu Nafarroak. Baso hostotsuak, sorginen bizileku izandako kobazuloak, lur lehorrak eta basamortuak, mendi garaiak, ibarrak, Erdi Aroko herriak, artea, kultura eta gastronomia dira, besteak beste, gurean egin daitezkeen plan eta jarduerak familian. 

Nafarroa helmuga lagunkoia da autokarabanetarako, zenbait gune jartzen baitizkie eskura. Gainera, zure gurpil gaineko etxerako zerbitzuak, propio egokituak, topatuko dituzu turismo-gune garrantzitsuenetako batzuetan: Urederraren iturburua, Iratiko oihana, Bardeak, Zugarramurdiko kobazuloak eta Irunberriko arroila. Aitzakiarik ez Nafarroaz autokarabanaz gozatzeko!

Autokarabanaren abantailak abenturak familian bizitzeko

Ziur gaude autokarabanaz bidaiatzeak dituen abantaila guztiak ezagutzen dituzula. Hala ere, honatx beste batzuk. Goazen! 

• Askatasuna eta malgutasuna. Inprobisazioa zure lagunik kutunena izango da. Ez da beharrezkoa askoz lehenago prestatzea camper edo autokarabanaz egin beharreko eskapadak. Abantaila handia da hori, batez ere erritmo bizi-biziko gure bizimoduan. Gainera, azken unean planak, edo helmuga, aldatzen badituzu, edo haurren bat gaixotzen bada, aldaketak ez dira batere traumatikoak izango. 
• Maskota baduzu, ongi etorri autokarabanara. Izan ere, pet friendly dira karabanak, zalantzarik gabe. 
• Familiako txikiek etengabeko arreta eskatzen badute oraindik, etxean bezala egongo dira autokarabanan. Bidea entretenigarria izango da, eta ez dira ariko “Noiz iritsiko gara” esan eta esan. Autokarabanaz bidaiatzearen beste abantailetako bat da beren ohean lo egingo dutela. Aldi batean egingo dute, eta lasaitu ederra izango da zuretzat.
• Espainian barna autokarabanaz bidaiatzeak zure oinarrizko beharrak asetzen ditu, estualdiak joz gero: lo egin, jan eta komunera joan, zeure etxean. Oinarrizkoak baina ezinbestekoak. 
• Ez duzu gogoko maletak prestatzea? Don’t worry, my friend! Bidaiatzea etxea soinean duzula maletak prestatu beharra ez izatea da, gauza asko autokarabanaren barruan egon ohi direlako berez. Aztertu eguraldiaren app-a eta sar ezazu ezinbestekoa baino ez, “badaezpadakoak” etxean utzita, tokia mugatua baita. 
• Eguraldi txarretan, irria ezpainetan. Izan ere, autokarabanara itzuli, eta familian jolastu ahalko duzue. Hotza eta euria ez dira arazo izango. 
• Izar izartsuaren azpian lo hartzea eta egunsentiarekin esnatzea... autokarabana batean lo egiteak ilunsenti eta egunsenti ahaztezinak bermatzen dizkizu. Ba al zenekien une horietako argiari “bitamina-argi” esaten zaiola?
• Ziklismoa edo kayak praktikatzea errazagoa da, gainera, autokarabanaz bidaiatuz gero. Kirola familian egitea, harremanak estutzeko eta oroitzapen ahaztezinak betirako sortzeko modua. 

Zalantzan bazenbiltzan, autokarabanaz bidaiatu edo ez, ziur duda guztiak uxatu dituzula honezkero: Nafarroan barna haurrekin autokarabanaz bidaiatzea plan biribila da! 

Presta zaitez abenturarako: aholkuak bidaiarako

Honezkero, jakin badakizu zer herri bisitatu behar dituzun ezinbestean eta zein diren txikiekin egiteko plan dibertigarrienak karabanan bidaiatu bitartean. Zer gehiago behar duzu, bada, zure hurrengo bidaia autokarabanaz izan dadin? Azken aholkuak baino ez! 

1.    Sartu segurtasuneko materiala, istripua gertatzen bada ere, hala nola txaleko islatzaileak eta DGTaren sentsorea, V16 baliza berria, 2026tik aurrera beharrezkoa izango baita. Egiaztatu autokarabanaren dokumentazioa behar bezala dagoela eta familiako guztien nortasun-agiriak eta osasun-txartelak daramatzazula. Baita zure iletsutxoarena ere!
2.    Kargagailuak hartu al dituzu? Eta linterna edo kopetako argia? Haiek ere garrantzitsuak dira, nahiz eta, ahaztuz gero, edozein tokitan eros ditzakezun. A! Hartu mahuka bat, autokarabanatik behar bezain hurbil ez dauden txorrotetatik ura hartu behar baduzu ere. 
3.    Eta, maleta itxi aurretik, utzi estresa bazter, eta bete ezazu ilusioz eta abentura berri bat familiarekin bizitzeko gogoz. 

Orain bai, azkena: Nafarroara udazkenean bazatoz autokarabanaz, Iratiko oihanak, Urederraren iturburuak eta Irunberriko arroilak are txundituta utziko zaituzte. 

Laster arte?