Erriberri - Uxue

Nafarroako gune turistiko garrantzitsuenetako bat Erriberri eta bere gaztelua dira, gotiko peto-petoak. Areto argitsuak, almenadun dorre ugari, patio ederrak eta material nobleak nonahi. Hori guztia ikusmenerako gozagarri den hiribildu batek inguratuta. Batez ere, udako Erdi Aroko bestetan. Eta gogoratu, etortzen zarenean etortzen zarela, lurralde honetako ardoak eta moskatelak dastatu behar dituzula; ziur errepikatu eginen duzula!

Postaletako herrien pareko beste bat da Uxue: etxetzarrez betetako harrizko kaletxoak, muinoaren gailurrean dagoen Uxueko Andre Maria santutegi-gotorlekua, eta Erriberaren eta Pirinioen ikuspegi zoragarriak. E

ta horiek bezain garrantzitsuak, bertako benetako artzain-apurrak, su-ontzian ateratzen direnak. Eta gertuko herri bateko elizan bisitatzea merezi duen kripta bat dago: San Martin Unx herrian.

Garai loriatsu honek adibide interesgarriak utzi dizkigu inguru honetan. Alde batetik, Artaxoako zerkoa; Erdi Aroko gotorlekua da, bederatzi dorre ditu, eta elizaren teilatuak dragoi baten bizkarra ematen du. Bertara igotzen ahal zara bisita gidatu batekin, eta handik herri polit honen herrigunea ikusiko duzu. Bestetik, La Olivako monasterioa, abitu zuriko hogei bat monjeren bizilekua; eliza zistertarra, klaustro gotikoa eta kapitulu-gela nabarmentzen dira. Eta, azkenik, Orbaibarko eliza erromaniko txikiak.

Antzinako gauzak gogoko baldin badituzu, Erriberri eta Lizarra artean Las Eretas aztarnategi arkeologikora hurbiltzen ahal zara; Burdin Aroko aztarnategia da, eta Kultura Intereseko Ondasun izendatu dute. Horretaz gain, bi aztarnategi arkeologiko erromatar ere badira, museo eta guzti: Arellano, Musen Mosaiko zoragarria duena, eta Andelos, non garai hartako sistema hidrauliko konplexua ikusten ahal den. Eta Erriberritik hegoalderantz joanez gero, Bardeatik oso gertu, Arradako Erdi Aroko eremu harresitua aurkituko dugu.