Dinosauroen bidea

Fiteron gaude, Nafarroako hego-mendebaldeko muturrean. Herria Iberiar penintsulan jarritako estreinako monasterio zistertarraren inguruan sortu zen, Andre Mariarena. Ur sendagarrien bainu-etxeak ere ematen dio ospe handia. Bideak Errioxako zati batean barna ere eramango gaitu. Dinosauroen aztarnategiak daude han, eta hortik bidearen izena.

Historiaurreko animalia horien aztarnei jarraiki, Alhama ibarrean barna ibiliko gara, maldan gora, suabe-suabe bada ere. Errioxako Rincón de Olivedo, Igea eta Cornago zeharkatuko ditugu.

Bigarren zatia, aldiz, maldan behera doa, erraz-erraz. LR-123 errepidea hartuko dugu, Nafarroaraino eramango gaituena. Amaitzeko, Fiterora iritsi aurretik, Corella zeharkatuko dugu. Bere alde historikoak etxetzarrak eta jauregiak ditu.